Condicións de uso do servizo de baliza rexistrada e condicións de venda

CONDICIÓNS DOS SERVIZOS ASOCIADOS AO REXISTRO DA SÚA BALIZA CON BIP&DRIVE

Estes termos e condicións de servizo (no sucesivo, as «Condicións») son aplicables aos servizos asociados á compra e rexistro da baliza V16 conectada á DXT 3.0 de acordo coa homologación pertinente que se pode consultar no envase do produto (no sucesivo, «a Baliza Rexistrada») e cos servizos accesorios e de valor engadido asociados ao seu rexistro, activación e funcionamento que se prestarán ao cliente, (no sucesivo, o «Usuario» ou «Vostede») tal e como se describe nestas Condicións por parte de Bip&Drive EDE, S.A. (no sucesivo, «Bip&Drive») con domicilio social na rúa Serrano 45, andar 2, Local A, 28001 Madrid.

Pode adquirir a Baliza Rexistrada a través do sitio web ou da aplicación de Bip&Drive, a través do servizo de atención ao cliente e dos puntos de venda utilizando unha tarxeta regalo ou outros medios, sempre que iso implique o envío do produto, a través do cal se efectúe unha compra a distancia, no sucesivo denominadas todas elas «canles de venda». Ao adquirir a Baliza Rexistrada, vostede acepta a prestación dos servizos asociados e, polo tanto, estas Condicións.

1. Servizos da Baliza Rexistrada

A Baliza Rexistrada está deseñada para emitir un sinal de emerxencia e transmitir a súa xeolocalización á Dirección Xeral de Tráfico (DXT) a través de redes de telecomunicacións. 

Esta Baliza Rexistrada, ademais, pon ao dispor do usuario mediante o rexistro dos seus Datos Identificadores e de Contacto e mais os Datos de Xeolocalización, no momento da compra ou despois dela, en función das canles de venda, os seguintes servizos:

1. Servizos relacionados co funcionamento da Baliza Rexistrada: Verificación remota do funcionamento da Baliza Rexistrada, así como verificación do estado da batería, das alertas de mantemento, da cobertura da rede, da posibilidade de conexión coa DXT así como calquera outro servizo relacionado co funcionamento do dispositivo.
2. Servizos relacionados coa comunicación a terceiros autorizados polo Usuario: tales como a comunicación da localización en tempo real ou a localización da Baliza Rexistrada, o envío de comunicacións sobre a incidencia a destinatarios designados dentro do servizo de emerxencias, as comunicacións cos seguros rexistrados, os servizos de reparación, os servizos de traslado ou asistencia en estrada, incluídos tamén tanto o vehículo como os seus ocupantes.
3. Servizos relacionados coa asistencia ao vehículo ou ao Usuario: servizos relacionados con talleres, reparacións, traslado do vehículo ou o seu rescate. Referencia de lugares, gasolineiras, estacións de servizo ou centros de asistencia médica ou auxilio.

Estes servizos só están dispoñibles se a Baliza Rexistrada está correctamente rexistrada en Bip&Drive para que lle forneza estes servizos ou calquera outros que Bip&Drive ofreza, sendo Bip&Drive nada máis que un intermediario dos servizos que vostede contrata a través da Baliza Rexistrada.

2. Obrigas do Usuario e cancelación dos servizos:

1. O Usuario deberá cumprir, en todo momento, coas Condicións e todas as leis aplicables. Ademais, o Usuario será o único responsable de verificar a exactitude e pertinencia da información recibida antes de realizar calquera acción baseada nela. Bip&Drive recomenda aos Usuarios que consulten fontes adicionais cando for preciso para tomaren decisións informadas.
2. Límites ao uso dos Servizos:
1. O Usuario non poderá (i) usar os Servizos de forma que infrinxa ou viole os dereitos de ningunha persoa ou entidade; (ii) facer enxeñaría inversa, descompilar, traducir ou intentar descubrir doutro xeito o funcionamento da Baliza Rexistrada ou do seu código fonte, dos seus compoñentes subxacentes dos modelos, dos algoritmos ou dos sistemas dos Servizos; (iii) tentar atentar contra a integridade do Servizo e recompilar calquera dato ou información enviada pola Baliza Rexistrada; (iv) empregar calquera método automatizado ou programático para extraer datos ou resultados dos Servizos, incluídos o scraping, o web harvesting ou a extracción de datos de calquera tipo.
2. Non debe empregar ningunha parte do contido da Baliza Rexistrada ou do material publicado nela, o que inclúe, a título enunciativo, textos, imaxes, música, vídeos, animacións, marcas comerciais, deseños, gráficos, interfaces visuais e códigos. Bip&Drive é propietaria ou licenciataria de todos os dereitos de propiedade intelectual, e todos os dereitos quédanlle reservados; ademais, fica prohibido o seu uso sen obter autorización previa para facelo pola nosa parte ou pola dos nosos licenciantes. Non se outorga licenza para empregar os nomes, logotipos ou marcas comerciais de Bip&Drive sen o consentimento expreso previo e por escrito.
3. Vostede recoñece que os servizos relacionados coa comunicación a terceiros autorizados polo Usuario e mais os servizos relacionados coa asistencia ao vehículo ou ao Usuario (tal e como se describen na cláusula 1, apartados (ii) e (iii)) poden conter ligazóns, software e servizos ou produtos de terceiros que estarán suxeitos aos seus propios termos e condicións. Neste sentido, Bip&Drive non se fará responsable baixo ningunha circunstancia do funcionamento de servizos ou produtos de terceiros, das consecuencias do seu uso nin dos fallos que poidan derivarse do seu uso.
4. Vostede recoñece e acepta que Bip&Drive é o propietario ou licenciatario de todos os dereitos de propiedade intelectual sobre as canles de venda, a súa aplicación e o seu sitio web, e todo o material publicado nela, o que inclúe, a título enunciativo, textos, imaxes, música, vídeos, animacións, marcas comerciais, deseños, gráficos, interfaces visuais e códigos. Estes dereitos están protexidos pola normativa aplicable e están reservados.
5. Bip&Drive reserva o dereito de cancelar o seu acceso aos servizos ou de bloquear o seu acceso futuro a eles, se consideramos que incumpriu estas Condicións.

3. Obrigacións de Bip&Drive:

1. Bip&Drive realizará todos os esforzos razoables para manter a operatividade e a dispoñibilidade da Baliza Rexistrada, en particular os servizos relacionados co funcionamento da Baliza Rexistrada: no apartado 1 (i) garantindo que os Usuarios poidan acceder aos Servizos de xeito continuado. Sen prexuízo do anterior, Bip&Drive non será responsable das interrupcións temporais, dos fallos técnicos, dos mantementos nin de calquera outra circunstancia fóra do seu control que impida o acceso á aplicación ou ao sitio web ou que afecte o funcionamento normal dos seus servizos.

4. Responsabilidade:

Bip&Drive limitarase exclusivamente a fornecer información sobre a Baliza Rexistrada relativa ao seu funcionamento e actuará como intermediario para a subministración de información de terceiros e dos seus servizos ou produtos. Bip&Drive non asume ningunha responsabilidade pola información fornecido respecto á súa veracidade, idoneidade ou finalidade, nin será tampouco responsable do uso que o Usuario faga da información subministrada nin das decisións tomadas en base a ela. 

En particular, Bip&Drive non será responsable dos danos directos, indirectos, incidentais, especiais ou consecuentes que poidan derivarse do uso ou da imposibilidade de usar os seus servizos, nin das decisións tomadas con base na información subministrada a través dos seus servizos.

5. Duración das Condicións, terminación do Servizo e uso da Baliza Rexistrada

1. As Condicións serán de aplicación a partir da súa aceptación. Pode solicitar a baixa deste servizo a través do noso Servizo de Atención ao cliente ou a través do formulario de contacto.
2. No caso de finalización do Servizo, poderá seguir utilizando os servizos de sinalización da Baliza, que seguirá estando certificada e conectada á DXT 3.0 segundo o establecido na regulación.
3. Bip&Drive reserva o dereito de modificar periodicamente as Condicións de uso mediante a publicación dunha versión revisada no seu sitio web. Os cambios entrarán en vigor inmediatamente despois da súa publicación no sitio web. O uso continuado dos Servizos despois de calquera cambio implicará a aceptación implícita dos cambios realizados sobre as Condicións.

CONDICIÓNS DE VENDA DA BALIZA REXISTRADA

Estas condicións de venda (no sucesivo, as «Condicións de Venda») son aplicables á compra da Baliza Rexistrada que vostede realice a través das canles de venda tal e como se definen nas Condicións.

Estas Condicións de Venda son o contrato aplicable entre vostede e Bip&Drive Bip&Drive EDE, S.A., con domicilio social na rúa Serrano 45, andar 2, Local A, 28001 Madrid (no sucesivo, «nós» ou «Bip&Drive»).
Lea polo miúdo as Condicións para coñecer os seus dereitos e obrigas. Pode gardar estas Condicións de Venda ou imprimilas para consultalas no futuro. Así mesmo, Bip&Drive gardará o texto de todo o contrato e porao ao seu dispor cando así o solicite.

1. Aplicabilidade e Atención ao cliente

Estas Condicións son aplicables a todas as ofertas, contratos e entregas realizados por Bip&Drive en relación coa venda a distancia da Baliza Rexistrada.

Estas Condicións de Venda non lle serán de aplicación nos seguintes supostos:
(i) Compras profesionais ou de empresas: No caso de que vostede non sexa un consumidor final con fins de consumo, senón unha empresa, sociedade ou entidade, estes termos e condicións non serán de aplicación. Rogámoslle que se poña en contacto con Bip&Drive para obter máis información sobre as condicións baixo as que pode realizar o seu pedido.
(ii) Compras realizadas en puntos de venda físicos que non requiran o envío do produto.

Atención ao cliente

O Usuario poderá contactar co Servizo de atención ao cliente de Bip&Drive a través de calquera das seguintes formas. Para coñecer os horarios de apertura do Servizo de atención ao cliente, rogámoslle que consulte a páxina de contacto do noso sitio web: https://www.bipdrive.com/contacto.

1. Teléfono: 911 113 737.
2. Correo electrónico: info@bipdrive.com.
3. Formulario de contacto: https://www.bipdrive.com/contacto 
4. Enderezo postal: Rúa Serrano 45, andar 2, 28001 Madrid.

2. Produto, prezos e pagamento

2.1. A Baliza Rexistrada axústase á súa descrición, ás especificacións informadas nas canles de venda, e ao especificado no correo electrónico de confirmación. A compra só se considerará realizada cando (i) vostede acepte estas Condicións de Venda, (ii) finalice o pagamento a través das canles de venda e unha vez Bip&Drive comprobade o pagamento e (iii) reciba un correo electrónico de confirmación do pedido.

2.2. Consulte as especificacións técnicas da Baliza Rexistrada no sitio web. A Baliza Rexistrada non ofrece máis garantías nin promesas de compatibilidade, interoperabilidade ou durabilidade que as descritas nas especificacións técnicas do produto.

2.3 Os prezos de venda da Baliza son os especificados no sitio web ou no punto de venda no que estean dispoñibles, e inclúen todos os dereitos, taxas e custos aplicables, incluído o IVE. Na desagregación do prezo indícanse os gastos administrativos e de entrega, que se inclúen no prezo final que se debe pagar polos produtos.

2.4. Os pagamentos deberán realizarse a través de calquera forma de pagamento proporcionada ao efecto nas canles de venda. Bip&Drive dirixirao á plataforma de pagamento correspondente. Calquera reembolso efectuarase na mesma tarxeta ou a través da mesma forma de pagamento que utilizou no momento de efectuar o pagamento orixinal.

2.5 Se desexase adiar o seu pagamento, e se o pagamento se realizou a través dalgunha das opcións de financiamento ofertadas, terá vostede unha relación directa co terceiro que adiase o pagamento da súa compra, e as condicións que resulten de aplicación serán as acordadas no momento en que acepte as condicións do devandito terceiro.

3. Política de garantía da Baliza Rexistrada vendida por Bip&Drive

Lembrámoslle a existencia dunha garantía legal de conformidade aplicable aos produtos, segundo o establecido no artigo 114 e seguintes do Real Decreto Lexislativo 1/2007, do 16 de novembro, Lei xeral para a defensa dos consumidores e usuarios («garantía legal»). Esta garantía legal de conformidade aplica a todos os produtos adquiridos en España. A duración da garantía legal é de tres anos a partir da entrega dos produtos ao consumidor por parte do vendedor. No caso de que o seu produto presente algunha falta de conformidade dentro deste período, terá dereito á reparación, substitución, rebaixa do prezo ou resolución do contrato, segundo corresponda e sen custo para vostede. Consulte a normativa para obter máis información sobre as condicións da garantía legal e consulte co noso Servizo de atención ao cliente se ten calquera dúbida. Ten a información ao seu dispor na cláusula primeira. 
É posible que, en ocasións, e de xeito voluntario, os fabricantes da Baliza Rexistrada outorguen unha garantía comercial adicional á garantía legal en España. Os termos e o prazo de duración serán os indicados, en cada caso, polo outorgante da garantía («garantía comercial»). Debe comprobar os termos desas garantías comerciais, que deberían estar incluídas dentro da caixa. 
Para exercer tanto a garantía legal como a garantía comercial cómpre presentar xustificacións documentais da compra e mais da entrega do produto.

4. Entrega

4.1. A entrega realizarase, unha vez confirmada a compra, nun prazo máximo de dez (10) días hábiles; aínda que o prazo poderá variar, debido a circunstancias imprevisibles ou extraordinarias, ao enderezo de entrega seleccionado por vostede ou á dispoñibilidade dos artigos en almacén, enviarase en todo caso nun prazo máximo de 30 días dende a data de confirmación do pedido. O envío é de balde para todos os pedidos.

4.2 O procedemento de entrega da Baliza Rexistrada pode variar en función do provedor loxístico que opera, quen se porá en contacto con vostede para facilitar a entrega. No caso de que a entrega non for posible por algún motivo, rogámoslle que se poña en contacto primeiro co provedor loxístico se dispón da información de entrega e, se non, lembre que pode poñerse en contacto co noso Servizo de atención ao cliente.

4.3. Se non for posible a entrega dentro do prazo de entrega mencionado, darémoslle aviso e vostede poderá rescindir o contrato; nese caso, reembolsarase calquera pagamento realizado en relación coa compra da Baliza Rexistrada. Os demais dereitos e recursos que ten en virtude da lei de defensa dos consumidores e usuarios non se verán afectados.

4.4. Lugar de entrega: todo o territorio español, agás as Illas Baleares, as Illas Canarias, Ceuta e Melilla. Esta limitación non será aplicable no caso de compra a distancia nos puntos de venda de Correos.

5. Dereito de desistencia

5.1. Como consumidor, ten vostede dereito a desistir o contrato nun prazo de catorce (14) días sen xustificación. O prazo de desistencia é de catorce (14) días naturais dende:

1. No caso da compra dunha Baliza Rexistrada: a data na que vostede, ou o terceiro nomeado por vostede que non sexa o transportista, adquiriu a posesión material das mercadorías.
2. No caso dun contrato de compravenda de varios produtos ou servizos, que vostede solicite como parte dun pedido individual e que se entreguen por separado: a data na que vostede, ou o terceiro nomeado por vostede que non sexa o transportista, teña ou tome posesión física do derradeiro produto (por exemplo, no caso dunha Baliza Rexistrada e VIA-T, unha vez reciba o último deses produtos).
3. No caso dos Servizos asociados á Baliza Rexistrada, a data será a data de celebración do contrato.

Pode exercer o seu dereito de desistencia mediante unha declaración clara da súa decisión de rescindir este contrato a través do noso formulario de contacto  https://www.bipdrive.com/contacto/ ou pode empregar o modelo de formulario de desistencia que figura nas nosas Condicións xerais de contratación, na última páxina.

Para exercer o seu dereito de desistencia dentro do prazo, abondará con que notifique a súa decisión de desistir o contrato antes de que expire o período de desistencia.
Se o último día dun período expresado doutro xeito que non sexa en horas é festivo, sábado ou domingo, o prazo rematará ao finalizar a última hora do día hábil seguinte.

5.2. No caso da Baliza Rexistrada, reembolsarémoslle decontado todos os pagamentos recibidos pola súa parte. Correremos cos custos de devolución da mercadoría, o que inclúe os gastos de entrega (agás os gastos adicionais derivados da selección dunha modalidade de entrega diferente pola súa banda e que sexa máis onerosa que a entrega estándar fornecida por Bip&Drive).

1. Vostede deberá facilitar a devolución do produto dentro dos catorce (14) días posteriores á comunicación de desistencia. A data límite considerarase cumprida se vostede enviou os produtos antes de que expire o prazo de catorce (14) días.
2. Se non pode devolver os produtos a Bip&Drive total ou parcialmente, ou se só os pode devolver nun estado deteriorado, deberá aboar a Bip&Drive o valor dos devanditos produtos en concepto de resarcimento, se for preciso. Se vostede solicitou o inicio dos servizos durante o período de desistencia, deberá pagar polos servizos consumidos, no caso de existir prezo ou cargo, como moi tarde catorce (14) días despois da data en que recibamos a comunicación de desistencia deste contrato pola súa parte.
3. No caso de que o produto forme parte dun paquete de produtos, e a fin de que reciba o reembolso íntegro, Bip&Drive poderá esixirlle a devolución de todos os paquetes de produto ou os agasallos que forman parte dos produtos.
4. O reembolso efectuarase, unha vez cumpridos os prazos e termos anteriores, dentro dos catorce (14) días e emitirase polo mesmo medio utilizado para o pagamento orixinal, agás se acorde o contrario entre vostede e Bip&Drive. En ningún caso cobraremos por que reciba este reembolso. É posible que reteñamos un reembolso ata recibirmos os produtos devoltos ou ata que vostede nos presente unha evidencia de que devolveu os produtos, o que aconteza primeiro.

6. Lei aplicable, forza maior e resolución de controversias.

A lei aplicable é a Lei de defensa dos consumidores de España. Se un produto é defectuoso ou se non cumpre co contrato de compravenda, poderá vostede optar pola reparación, o reembolso ou a substitución do seu produto de balde.

No caso dun evento de forza maior (por exemplo, folgas ou condicións meteorolóxicas extremas), as obrigas das partes en virtude do contrato suspenderanse mentres dure a devandita situación de forza maior.

Resolución de controversias: vostede (como consumidor) tamén pode presentar unha reclamación perante os organismos do país local de resolución de controversias en liña autorizados na plataforma de resolución de litixios en liña da Comisión Europea en http://ec.europa.eu/odr. Bip&Drive non terá a obriga de participar no procedemento de resolución de controversias, nin ten tampouco intención de participar nese procedemento perante unha entidade de resolución de controversias alternativa nin nunha resolución de litixios en liña da UE.